Útgjald
Tað ganga nakrar vikur, til tú fært arbeiðsloysisstuðul útgoldnan fyrstu ferð. Vanliga tekur tað 2 vikur hjá ALS at viðgera umsóknina.
Eru umsókn og fylgiskjøl í lagi beinanvegin, gongur tað skjótari, enn um upplýsingar vanta.
Vanliga verður arbeiðsloysisstuðul útgoldin annan hvønn týsdag vikuna eftir ALS-vikuna. Útgjaldið verður flutt á kontu í peningastovnunum.
Í ALS-kalendaranum sært tú, nær tú fært útgjald frá ALS.
Arbeiðsloysisstuðulin verður roknaður út eftir A-inntøkuni seinastu 12 mánaðirnar, áðrenn arbeiðsloysið varð staðfest. Hetta verður vanliga kallað útrokningargrundarlagið. Mesta útgjaldið er 80% av A-inntøkuni – tó í mesta lagi 877,44 kr. um dagin, sum svarar til í meðal 18.500 kr. um mánaðin. Útrokningargrundarlagið er óbroytt, meðan tú ert inni í skipanini.
Fert tú úr ALS og kemur inn aftur í skipanina, kann tað ávirka útgjaldið, tí útgjaldið verður sum sagt altíð roknað eftir inntøkuni seinastu 12 mánaðirnar, áðrenn arbeiðsloysi verður staðfest. Er minni enn eitt ár, síðan tú seinast vart í skipanini, varðveitir tú tó útrokningargrundarlagið frá seinast, um hetta var hægri.
Arbeiðsloysisstuðul kann í mesta lagi verða útgoldin í 648 dagar í einum 4 ára skeiði. Síðani steðgar útgjaldið, og tú hevur ongan rætt til arbeiðsloysisstuðul teir næstu 24 mánaðirnar. Eftir hetta kanst tú koma inn aftur í skipanina – eftir somu treytum sum tey, ið søkja um arbeiðsloysisstuðul fyrstu ferð.
Øll fáa 2 bíðidagar (dagur uttan útgjald), og alt eftir inntøku kann talan gerast um fleiri enn 2 bíðidagar.
Hóast arbeiðsloysið verður staðfest, longu tá ið tú boðar ALS frá, kann henda, at tú ikki fært stuðul fyrstu átta vikurnar vegna karantenu.