Tíðindi

18.10.2011 | ALS setir segl

Saman við navnframa skiparanum og gastronominum Birgiri Enni sleppa ungdómar nú at snodda til sjólívið umborð á Norðlýsinum.

Birgir Enni hevur langt síðani rist navn sítt fast í minni á øllum føroyingum og talleysum útlendingum. Tey munnu vera fá, sum ikki við góðum byrði hava staðið undir spentu, myrkareyðu seglunum á Norðlýsinum og hava roynt framúr góðu fiskasúpanina hjá Birgiri. Hann hevur ferðast víða, siglt nógv og at matgera er hann knáur sum fáur. Birgir hevur borðreitt fyri høgum sum lágum, og hann hevur av sonnum sligið fast, at hjallurin er á sjónum. Birgir hevur av álvara latið eyguni á føroyingum upp fyri tí tilfeingi, sum liggur næst fyri – fiski, krabba, kræklingi, tara og hópin av øðrum sjógæti. Ja, sjálvt kokkarnir á eini av heimsins allarbestu matstovum, NOMA í Keypmannahavn leita sær til Birgir at fáa íblástur um norðurlendskar rávørur.

Nú stendur føroyskum ungdómi í boði at royna seg saman við Birgiri og hansara monnum umborð á Norðlýsinum. Arbeiðsloysisskipanin hevur gjørt avtalu við Birgir Enni um, at arbeiðsleysir ungdómar skulu fáa høvið at royna seg á einum longri túri við Norðlýsinum. Fyrsti túrurin verður nú í oktober, og hann verður eina lítla viku til longdar, og umborð fara tey at læra at rigga skipið til, læra at sigla við seglum og snodda til sjólívið. Tey fara at matgera saman við einum tí besta kokkinum í landinum – sjálvandi við fiski, sum tey sjálvi fiska og skeljadjórum, sum tey sjálvi kava eftir.

Á túrinum kring Føroyar er eisini ætlanin at vitja ymisk virkir.

Norðlýsið loysir fyrsta túrin av hesum slagi mánadagin 24. oktober, og verður tiltakið væleydnað, er ætlanin at skipa fleiri slíkar túrar.

Ernst Jacobsen, stjóri á ALS heldur, at tørvur er á slíkum øðrvísi tiltøkum fyri at hjálpa teimum ungu fram. “Arbeiðsloysi millum ung er ein serlig avbjóðing, og vit hava skyldu at gera alt tað, vit kunnu fyri at hjálpa teimum ungu á veg. Við hesum sleppa tey ungu at snodda til fleiri ymisk fak, tey læra eitt sindur um lívið á sjónum, tey læra at matgera og sleppa at royna at kava. Tað týdningarmesta av øllum er tó, at tey sleppa at bjóða sosialu avbjóðingunum av, tí luttakararnir fara at búgva umborð á Norðlýsinum saman við manningini, og tað krevur, at øll duga at taka atlit til hvønn annan og at laga seg eftir hvørjum øðrum.”

“Hetta er eitt gylt høvi at royna nýggjar avbjóðingar og at fáa einastandandi upplivingar fyri lívið, og vit á Arbeiðsloysisskipanini eru errin um at kunnu bjóða ungum fólki henda møguleika, og vit vóna, at áhugin fyri hesum átakinum verður stórur.”, sigur Ernst.

Birgir Enni, skipari á Norðlýsinum, heldur, at tað er av stórum týdningi at geva ungum fólki lívsroyndir, og hann heldur, at Norðlýsið er eitt gott skip til endamálið. “Vit fara at sigla við seglum og virka mat úr sjónum og fjørðuni, og so fara vit eisini at vitja áhugaverd støð”, sigur Birgir Enni og leggur afturat, at tað verður spennandi at vera saman øll umborð á einum skipi, har hvør hevur sínar uppgávur.

Frítíðarløn

Kunnandi fundur25.03.2013

Nýggjur stjóri settur27.02.2013

36 umsøkjarar18.02.2013

Rannvá fer víðari18.02.2013

Sveinabræv frá lívsins skúla08.02.2013

Móttøkan avlýst14.01.2013

Nýggjur stýrisformaður14.01.2013

Stjórin á ALS takkar fyri seg09.01.2013

Jólafrí 27. desember - 1. januar17.12.2012

Birkolasj á Tvøroyri12.12.2012

Johan Dahl vitjaði Vakstrarhúsið31.10.2012