Tíðindi

26.06.2009 | Ársroknskapur 2008

Arbeiðsloysið byrjaði at hækka seinnu hálvu 2008

Arbeiðsloysið í Føroyum hevur verið minkandi síðan februar 2005, men í juli 2008 vendi gongdin, og arbeiðsloysið fór at vaksa aftur.

Við árslok 2008 fingu 513 persónar vanligt útgjald frá Arbeiðsloysisskipanini, og við byrjan av árinum vóru tað 301 persónar. Tað merkir, at talið á persónum, sum fáa vanligt útgjald frá Arbeiðsloysisskipanini við árslok 2008 vóru 1,8 % av arbeiðsfjøldini, við árslok 2007 var arbeiðsloysið 1,3%. Samanborið við grannalond okkara høvdu Føroyar næst lægsta arbeiðsloysi í norðanlondum við árslok 2008, einans Noreg hevði eitt lægri arbeiðsloysi.

Øll arbeiðstøk í Føroyum eru skrásett í arbeiðsávísingini á alnetinum, starv.fo, sum fór í luftina í 2006. Arbeiðsgevarar kunnu leita eftir fólki í skipanini, eins og teir eisini beinleiðis kunnu lýsa eftir fólki á starv.fo. Fólk, sum leita sær eftir nýggjum starvi, kunnu eisini skráseta seg í skipanini, sum higartil hevur roynst væl.

Millum 60 og 110 lýsingar liggja vanliga á starv.fo, og 1100-1200 ymiskir brúkarar vitja skipanina hvørja viku.

Lægri útgjald
Hóast talið av persónum, ið fáa útgjald frá Arbeiðsloysisskipanini, er vaksið í 2008, er miðalarbeiðsloysið lægri í 2008 enn í 2007, og hetta sæst aftur í útgjaldinum frá ALS. Í 2008 rindaði ALS tilsamans 31,8 milliónir krónur í vanligum arbeiðsloysisstuðli. Hetta talið var 34,7 milliónir krónur í 2007, og tað er ein minking upp á 8,4 prosent.

Útgjaldið til arbeiðsfólk á fiskavirkjum er lítið broytt í 2008 sambanborið við 2007, útgjaldið var 13,8 mió. í 2008 í mun til 13,4 mió. í 2007.

Í 2008 rindaði ALS tilsamans 45,6 milliónir krónur í útgjøldum til vanligan arbeiðsloysisstuðul, fiskavirkisskipanina, førleikamenning og í arbeiðsmarknaðargjøldum, sum eru partur av vanliga arbeiðsloysisstuðlinum og stuðlinum umvegis fiskavirkisskipanina. Samlaðu útgjøldini vóru 48,1 mió. kr. í 2007, og her er talan um 5,3% í minking frá 2007 til 2008.

Rakstrarúrslit
Rakstrarúrslitið hjá ALS var 56,2 milliónir krónur í 2008. Tað er munandi slakari ár enn í 2007, tá úrslitið var 93,6 milliónir krónur. Orsøkin til at úrslitið gjørdist verri eru fíggjarpostarnir, sum gjørdust minus 24,1 mió. kr. í 2008 samanborið við 15,4 mió. kr. í 2007. Tekniska úrslitið var annars betri í 2008 enn í 2007. Eginognin øktist upp í góðar 696,2 milliónir krónur við ársenda 2007.

Inngjøldini til ALS vóru tilsamans 141,2 milliónir krónur í 2007 sammett við 140,1 milliónir krónur árið fyri. Tað er ein hækking upp á 0,7 prosent. ALS-gjaldið var seinast broytt 1. juli 2004, tá tað var sett til eitt prosent av lønini fyri arbeiðstakarar og arbeiðsgevarar, og tað hevur sostatt verið tað sama í 2007 og 2008.

Sí annars ársroknskapin fyri 2008 við samanberingartølum fyri 2007 her. Møguligt er somuleiðis at síggja hagtøl her.

Nýggjan bygning
Í oktober 2008 keypti Arbeiðsloysisskipanin ein bygning á Tinghúsvegnum í Tórshavn til at húsast í. Talan er um ein bygning, sum er bygdur í 1989. Bygningurin liggur væl fyri í miðbýnum, og við ábøtum er hann vælegnaður til at hýsa virkseminum hjá Arbeiðsloysisskipanini.

Útlitini fyri 2009
Heimsumfatandi búskaparkreppan tók seg av álvara upp í september 2008 og hevur spjatt seg til fíggjarmarknaðirnar kring heimin.

Arbeiðsloysið var í miðal í 2008 1,3%. Við endan av apríl 2009 er arbeiðsloysið 3,4% og Landsbankin metir, at arbeiðsloysið kann koma uppá 4% í miðal fyri árið 2009.

14. mai 2009 samtykti Løgtingið umfatandi broytingar í ALS-lógini, mest týðandi broytingarnar eru m.a. at útgjaldið hækkar upp í 80% av útrokningargrundarlagnum (tó í mesta lagi 20 tús. kr. fyrsta árið og 75% restina av útgjaldsdøgunum), bíðidagarnir fella burtur, útlendingar kunnu eftir umsókn verða frítiknir at rinda ALS-gjald, og skipan verður gjørd til fiskimenn, tá skip verða løgd í longri tíð í samband við umvæling. Lógarbroytingarnar hava við sær, at útgjaldið til arbeiðsleys verður økt, og kemur hetta at ávirka rakstrarúrslitið hjá Arbeiðsloysisskipanini og kemur skipanin at hava hall nøkur ár.

Vísandi til at egingognin er slakar 700 mió. kr., er skipanin væl fyri at taka ímóti einum øktum arbeiðsloysi.

Frítíðarløn

Kunnandi fundur25.03.2013

Nýggjur stjóri settur27.02.2013

36 umsøkjarar18.02.2013

Rannvá fer víðari18.02.2013

Sveinabræv frá lívsins skúla08.02.2013

Móttøkan avlýst14.01.2013

Nýggjur stýrisformaður14.01.2013

Stjórin á ALS takkar fyri seg09.01.2013

Jólafrí 27. desember - 1. januar17.12.2012

Birkolasj á Tvøroyri12.12.2012

Johan Dahl vitjaði Vakstrarhúsið31.10.2012